హైదరాబాద్ కు దగ్గర్లో హనీమూన్ ప్రదేశాలు!

నిత్యం జనాభాతో రద్దీగా ఉండే హైదరాబాద్ నగరానికి చేరువలో కొన్ని ఫేమస్ హనీమూన్ ప్రదేశాలు ఉన్నాయి. ముఖ్యంగా చలికాలంలో హైదరాబాద్ నుంచి ఇక్కడికి వెళ్లే పర్యాటకుల సంఖ్య ఎక్కువగా ఉంటుంది. వింటర్ లో చలితో పాటు పెళ్లిళ్ల సీజన్ కూడా ప్రారంభం కావడంతో కొత్త జంటలు హనీమూన్ ప్రదేశాలకు ప్రాధాన్యత ఇస్తుంటారు. హైదరాబాద్ కు దగ్గర్లో ప్రకృతి అందాలతో మిమ్మల్ని ప్రేమలో పడేసే 9 రొమాంటిక్ హనీమూన్ ప్రదేశాల వివరాలు ఏమిటో ఇప్పుడు తెలుసుకుందాం.

​*అనంతగిరి కొండలు:

సహజ సిద్ధ ప్రకృతి వాతావరణం మధ్య హైదరాబాద్ కు 80 కిలోమీటర్ల దూరంలో అనంతగిరి కొండలు ఉన్నాయి. మూసీ నది జన్మస్థానంగా చెప్పే ఈ ప్రాంతం పక్షుల కిలకిలలు, పచ్చని అడవుల మధ్య ఎంతో సుందరంగా కనిపిస్తుంది. ప్రశాంతమైన వాతావరణం మధ్య ఈ ప్రాంతం యొక్క అసలైన అందం బయటపడుతుంది.

అనంతగిరి కొండలపై చేయాల్సినవి:కటికి జలపాతాల వద్ద ఓ ఆహ్లాదభరిత సమయాన్ని గడపడమే కాకుండా మూసీ నది కొండలపై నుంచి కిందికి జాలువారే రమణీయ దృశ్యాలను వీక్షించి తీరాలి. ఇంకాస్త ఉత్కంఠభరిత పనులు చేయాలనుకునే వారు డెక్కన్ ట్రైల్ వద్ద రాత్రిపూట క్యాంపింగ్, రాక్ క్లైంబింగ్, రాపెల్లింగ్ వంటి సాహసభరిత కార్యకలాపాలను ఎంపిక చేసుకోవచ్చు.

అనంతగిరికి ఎలా వెళ్లాలి:అనంతగిరికి ఆరు కిలోమీటర్ల దూరంలో ఉన్న వికారాబాద్ ఇక్కడికి దగ్గరి రైల్వే స్టేషన్. అదే విధంగా హైదరాబాద్ నుంచి డ్రైవింగ్ చేసుకుంటూ, అందమైన ప్రకృతి దృశ్యాలు వీక్షిస్తూ రోడ్డు మార్గం ద్వారా కూడా వెళ్లవచ్చు.

మంచి సమయం:సెప్టెంబర్ నుంచి జనవరి మధ్య అనంతగిరి సందర్శన ఎంతో ఆహ్లాదభరితంగా ఉంటుంది. ఏపీ టూరిజం శాఖకు చెందిన వివిధ రిసార్ట్ లు ఇక్కడ అందుబాటులో ఉంటాయి.

​*పోచారం డ్యామ్, వన్యప్రాణి అభయారణ్యం:

పోచారం సరస్సు చుట్టూ 130 చదరపు కిలోమీటర్ల విస్తీర్ణంలో పోచారం ఆనకట్ట, వన్యప్రాణి అభయారణ్యం ఉన్నాయి. హైదరాబాద్ నుంచి 120 కిలోమీటర్ల దూరంలో ఉండే ఈ ప్రదేశం ప్రశాంతమైన వాతావరణం, ప్రకృతి అందాలతో ఆకర్షణీయంగా కనిపిస్తుంది. హైదరాబాద్ దగ్గర్లో అధికంగా సందర్శించే హనీమూన్ ప్రదేశాల్లో ఇది ఒకటి.

చేయాల్సిన పనులు: బోటింగ్, మెదక్ కోట సందర్శన, పక్షుల వీక్షణతో పాటు అనేక అరుదైన వన్య ప్రాణులను అన్వేషించవచ్చు.

ఎలా చేరుకోవాలి: మెదక్ పట్టణం నుంచి బస్సు లేదా క్యాబ్ ద్వారా ఇక్కడికి చేరుకోవచ్చు

మంచి సమయం: అక్టోబర్ నుంచి జూలై మాసాల మధ్య పోచారం పర్యటన ఆహ్లాదభరితంగా ఉంటుంది

*​మహబూబ్ నగర్:

వారసత్వ పట్టణంగా పిలువబడే మహబూబ్ నగర్ హైదరాబాద్ కు 100 కిలోమీటర్ల దూరంలో ఉంది. హైదరాబాద్ కు దగ్గర్లో ఉన్న సుందరమైన హనీమూన్ ప్రదేశాల్లో ఒకటిగా దీనికి ప్రత్యేకత గుర్తింపు ఉంది. స్థానికంగా దీన్ని పాలమూరు లేదా చోళ రాజవంశ భూ భాగం అని అనేవారు. పాత రాతి యుగం నాటి అనేక అవశేషాలకు ఇది అద్దం పడుతుంది.

చేయాల్సిన పనులు: మీ జీవిత భాగస్వామితో కలిసి శతాబ్ధాల కాలం నాటి పాత మసీదులను, డైమండ్ గనులను సందర్శించండి.

ఎలా చేరుకోవాలి: హైదరాబాద్ నుంచి నేరుగా బస్సు లేదా రైలు మార్గాల ఇక్కడికి సులభంగా చేరుకోవచ్చు.

మంచి సమయం: నవంబర్ నుంచి ఫిబ్రవరి వరకూ ఈ ప్రాంతం పర్యటనలకు ఎంతో అనువుగా ఉంటుంది. పర్యాటకుల కోసం వివిధ ధరల్లో వసతి సదుపాయాలు కూడా ఉంటాయి.

​*కర్నూల్:

తుంగభద్రా నదికి ఆనుకుని ఉండే కర్నూల్ పట్టణం హైదరాబాద్ కు దగ్గర్లో హనీమూన్ జంటలకు ఓ అద్భుతమైన గమ్యస్థానం. నగరం నుంచి ఇక్కడికి 218 కిలోమీటర్ల దూరం. ప్రకృతి అందాల మధ్య మీ బంధాన్ని మరింత బలపరుచుకునేందుకు హైదరాబాద్ నుంచి ఇక్కడికి రోడ్ ట్రిప్ ద్వారా వెళ్లడం ఓ గొప్ప అవకాశం. ఇక్కడ చూడాల్సిన చారిత్రక, వారసత్వ ప్రదేశాలు ఎన్నో ఉన్నాయి.

చేయాల్సిన పనులు: పక్షుల వీక్షణ, రొల్లపాడు అభయారణ్యం సందర్శన, ఒరవకళ్లు రాక్ గార్డెన్ కు పిక్నిక్

ఎలా వెళ్లాలి: హైదరాబాద్ నగరం నుంచి కర్నూల్ వరకూ రోడ్ ట్రిప్ మీకు మర్చిపోలేని అనుభవాన్ని అందిస్తుంది.

సందర్శనకు సరైన సమయం: అక్టోబర్ నుంచి మార్చి మాసాల మధ్య కర్నూల్ సందర్శనకు అనువుగా ఉంటుంది.

​*వరంగల్:

వారసత్వ నగరంగా పేరొందిన వరంగల్ హైదరాబాద్ నుంచి 150 కిలోమీటర్ల దూరంలో ఉంటుంది. ఇక్కడి అద్భుతమైన ప్రకృతి దృశ్యాలు, భవనాలు ఈ ప్రాంతాన్ని హైదరాబాద్ కు దగ్గర్లోని రొమాంటిక్ ప్రదేశాల్లో ఒకటిగా నిలిపాయి. పురాతన కోటలు, ఆకర్షించే సరస్సుల ద్వారా ఇక్కడికి వచ్చే జంటలు తమ రొమాంటిక్ హాలిడేను ఉత్సాహభరితంగా గడుపుతారు.

చేయాల్సిన పనులు: రామప్ప సరస్సులో బోటింగ్ చేయడంతో పాటు వరంగల్ కోటను అనువణువునా చూడడం మంచి అనుభూతిని ఇస్తుంది.

ఎలా వెళ్లాలి: హైదరాబాద్ నుంచి వరంగల్ కు నేరుగా ట్రైన్ లేదా బస్సు ద్వారా చేరుకోవచ్చు.

మంచి సమయం: అక్టోబర్ నుంచి మార్చి మాసాల మధ్య వరంగల్ పర్యటన బాగుంటుంది. పర్యాటకుల కోసం వివిధ ధరల్లో ఇక్కడ అన్ని రకాల వసతి సదుపాయాలు ఉంటాయి.

*​హంపి:

దక్షిణ భారతదేశంలోని కర్ణాటక రాష్ట్రంలో ఉన్న చారిత్రక హంపి గ్రామం దేశ విదేశీ టూరిస్టులకు ప్రసిద్ధ గమ్యస్థానం. ఇక్కడి శిధిలాలు, ఆలయ సముదాయాలు విజయనగర సామ్రాజ్యం కాలంనాటి అనుభవాలను మీకందిస్తాయి. 7వ శతాబ్ధం నాటి హిందూ విరూపాక్ష ఆలయం, హంపి బజార్ వంటి వివిధ ప్రధాన ఆకర్షణలు పర్యాటకులను ఎంతో ఆకట్టుకుంటాయి. మీరు వన్యప్రాణి ప్రేమికులైతే ఇక్కడికి దగ్గర్లో దరోజీ ఎలుగుబంట్ల అభయారణ్యాన్ని కూడా సందర్శించవచ్చు. హైదరాబాద్ నుంచి ఇక్కడికి 377 కిలోమీటర్ల దూరం.

చేయాల్సిన పనులు: నదిలో పడవ ప్రయాణం, దరోజీ ఎలుగుబంట్ల అభయారణ్యంలో వన్యప్రాణుల వీక్షణ, విరూపాక్ష ఆలయ శిధిలాల మధ్య సూర్యాస్తమయం చూడడం.

ఎలా వెళ్లాలి: మీ జీవిత భాగస్వామితో కలిసి విమాన ప్రయాణం ఆస్వాదించాలనుకుంటే బెలగాం లేదా బెంగళూరు విమానాశ్రయంకు హైదరాబాద్ నుంచి విమానంలో వెళ్లవచ్చు. అక్కడి నుంచి బస్సు లేదా ట్యాక్సీ ద్వారా హంపికు సులభంగా చేరుకోవచ్చు.

మంచి సమయం: అక్టోబర్ నుంచి ఫిబ్రవరి మాసాల మధ్య హంపి సందర్శన అద్భుతంగా ఉంటుంది.

*​పఖల్ సరస్సు, అభయారణ్యం:

హైదరాబాద్ కు 200 కిలోమీటర్ల దూరంలో ఉండే పఖల్ సరస్సు, వన్యప్రాణి అభయారణ్యం అందమైన ఫోటోజెనిక్ ప్రదేశాలకు కేరాఫ్. ఇక్కడ ఉండే అనేక ప్రత్యేకతలు ఈ ప్రదేశాన్ని సుందరమైన హనీమూన్ గమ్యస్థానంగా మార్చాయి. సిటీ లైఫ్ నుంచి బయటపడాలనుకునే జంటలు ఈ ప్రదేశాన్ని తరచుగా సందర్శిస్తుంటాయి. హనీమూన్ జ్ఞాపకాలను పదిలపరుచుకునే ఓ అందమైన ప్రదేశంగా దీనిని అభివర్ణిస్తుంటారు.

చేయాల్సిన పనులు: మీ భాగస్వామితో కలిసి అభయారణ్యంలో జీప్ సఫారీ, నేచర్ వాక్ ఎంతో ఉల్లాసంగా అనిపిస్తాయి. వన్యప్రాణుల వీక్షణతో పాటు బోటింగ్ ద్వారా ఇక్కడి సహజసిద్ధ ప్రకృతి అందాలను కనుగొనడం ప్రత్యేక అనుభూతిని అందిస్తుంది.

ఎలా వెళ్లాలి: హైదరాబాద్ నుంచి డ్రైవ్ చేసుకుంటూ రోడ్డు మార్గం ద్వారా నాలుగున్నర గంటల్లో సులభంగా ఇక్కడికి చేరిపోవచ్చు. రైలు మార్గం ద్వారా వచ్చే వారు వరంగల్ వరకూ వచ్చి అక్కడి నుంచి క్యాబ్ లేదా బస్సు ద్వారా చేరుకోవాల్సి ఉంటుంది.

మంచి సమయం: నవంబర్ నుంచి జూన్ మధ్య ఇక్కడ పర్యటన ఆహ్లాదభరితంగా ఉంటుంది. బస చేసేందుకు వీలుగా రెస్ట్ హౌస్ లు కూడా అందుబాటులో ఉంటాయి.

​*హార్సిలీ హిల్స్:

సముద్ర మట్టానికి 1265 మీటర్ల ఎత్తులో ఉండే హార్సిలీ హిల్స్ హిల్ స్టేషన్ తెలుగు రాష్ట్రాల్లో ప్రముఖ హనీమూన్ గమ్యస్థానంగా పేరుగాంచింది. హనీమూన్ జంటలు ప్రకృతి అందాలను ఆస్వాదించడంతో పాటు ఈ చల్లని వాతావరణం మధ్య రొమాంటిక్ గా సమయం గడపవచ్చు. ఈ హిల్ స్టేషన్ నుంచి కనిపించే ప్రకృతి దృశ్యాలు సందర్శకులను కట్టిపడేస్తాయి. హైదరాబాద్ నుంచి 533 కిలోమీటర్ల దూరంలో ఉండే ఈ పర్వత ప్రాంతానికి రెండు రోజుల ట్రిప్ ను ప్లాన్ చేసుకుంటే హనీమూన్ జంటలు గొప్ప సమయాన్ని గడపవచ్చు.

చేయాల్సిన పనులు: ట్రెక్కింగ్, హైకింగ్, రాపెల్లింగ్, వ్యూపాయింట్ నుంచి సూర్యాస్తమయం వీక్షణ, కౌండిన్య వన్యప్రాణి అభయారణ్యం సందర్శన

ఎలా వెళ్లాలి: హైదరాబాద్ నుంచి తిరుపతి ఎయిర్ పోర్ట్ కు విమానం ద్వారా లేదా మదనపల్లి రైల్వే స్టేషన్ కు రైలు ప్రయాణం ద్వారా చేరుకోవచ్చు. అక్కడి నుంచి హార్సిలీ హిల్స్ కు నేరుగా ట్యాక్సీ ద్వారా వెళ్లవచ్చు.

మంచి సమయం: సెప్టెంబర్ నుంచి మే మధ్య హార్సిలీ హిల్స్ సందర్శన మరపురాని విధంగా ఉంటుంది.

*​బీదర్:

పురాతన కోట కలిగిన బీదర్ పట్టణం హైదరాబాద్ సమీపంలోని అత్యంత నిర్మలమైన, అసాధారణ హనీమూన్ గమ్యస్థానాల్లో ఒకటి. హైదరాబాద్ నగరానికి ఇది 150 కిలోమీటర్ల దూరంలో ఉంటుంది. ఉరుకుల పరుకుల సిటీ లైఫ్ నుంచి దూరంగా వారాంతాల్లో ఇక్కడికి వెళ్లి వచ్చేందుకు కొత్త జంటలు ఆసక్తి చూపుతుంటాయి.

చేయాల్సిన పనులు:చారిత్రక అనుభవాన్ని పంచే బీదర్ కోటను మీ భాగస్వామితో కలిసి సందర్శించడం మరపురాని అనుభూతిని మీకందిస్తుంది.

ఎలా చేరుకోవాలి:డ్రైవ్ చేసుకుంటూ వెళితే 4 గంటల్లో హైదరాబాద్ నుంచి బీదర్ చేరుకోవచ్చు. రైళ్ల రాకపోకలు కూడా హైదరాబాద్, బీదర్ మధ్య నిత్యం నడుస్తుంటాయి.

మంచి సమయం: జూన్ నుంచి సెప్టెంబర్, నవంబర్ నుంచి ఫిబ్రవరి మాసాల మధ్య బీదర్ పర్యటన ఆహ్లాదభరితంగా ఉంటుంది.