సంతానోత్పత్తి సామర్థ్యం మీద ఆల్కహాల్ ప్రభావం!

చాలా మంది మద్యం తీసుకోవడం వల్ల సంతానోత్పత్తి సామర్థ్యం మీద ప్రభావం చూపుతుందని అనుకుంటారు. ఈ అంశంపై అనేక పరిశోధనలు కూడా జరిగాయి. అయితే ఒక్కో పరిశోధనలో ఒక్కో రకమైన ఫలితాలు వెల్లడయ్యాయి. సంతానం కోసం ప్రయత్నించే వారు ఆల్కహాల్ తీసుకోవడం తగ్గించడం మంచిదని చాలా మంది భావిస్తారు. కనీస మోతాదులో ఆల్కహాల్ తీసుకోవడం కంటే పరిమితికి లోబడి ఓ మాదిరిగా ఆల్కహాల్ తీసుకోవడం బెటరని తాజా పరిశోధనలో వెల్లడైంది. వారానికి రెండు నుంచి నాలుగు పింట్ బీర్లు లేదంటే మూడు క్వార్టర్‌‌ల వైన్ తీసుకునే వారిలో స్పెర్మ్ కౌంట్, వీర్యద్రవం గాఢత మెరుగ్గా ఉన్నట్టు గుర్తించారు.వారానికి 3 యూనిట్లు లేదా అంత కంటే తక్కువ మోతాదులో ఆల్కహాల్ తీసుకునే వారితో పోలిస్తే.. 4-7 యూనిట్లు తీసుకునే వారిలో స్పెర్మ్ కౌంట్ బాగున్నట్టు పరిశోధనలో వెల్లడైంది. మద్యాన్ని పూర్తిగా మానేయకుండా ఓ మోస్తరుగా తీసుకునే వారిలో వీర్యద్రవం నాణ్యత బాగుందని మిలాన్‌కు చెందిన పరిశోధకులు వెల్లడించారు. ఇదేదో బాగుందే అని అతిగా తాగితే మాత్రం ఇబ్బందులు తప్పవు. రోజుకు రెండు పింట్ బీర్లు లేదా 40 యూనిట్లకు మించి తాగిన వారిలో స్పెర్మ్ కౌంట్ 33 శాతం తగ్గినట్టు 2014 నాటి అధ్యయనం తేల్చింది. వారానికి ఐదు యూనిట్లకు మించి తాగినా స్పెర్మ్ క్వాలిటీ తగ్గుతున్నట్టు ఆ పరిశోధన హెచ్చరించింది. కాబట్టి తాజా అధ్యయనం ఏడు యూనిట్ల వరకూ ఓకే చెప్పినప్పటికీ.. కాస్త జాగ్రత్తగా ఉండటం బెటర్.