దేశంలో కొత్త డ్రైవింగ్ లైసెన్స్‌లు, ఆర్‌సీలు!
మార్చ్ 13: కేంద్ర ప్రభుత్వం వెహికల్ రిజిస్ట్రేషన్ కార్డ్స్ (ఆర్‌సీ), డ్రైవింగ్ లైసెన్స్‌ల విషయంలో పలు కీలక నిర్ణయాలు తీసుకోనుంది. వెహికల్ రిజిస్ట్రేషన్ కార్డ్స్ (ఆర్‌సీ), డ్రైవింగ్ లైసెన్స్‌లకు సంబంధించి దేశవ్యాప్తంగా ఒకేరకమైన విధానాన్ని అమలులోకి తీసుకురావాలనే నేపథ్యంలో సరికొత్త ఆర్‌సీలను, డ్రైవింగ్ లైసెన్స్ కార్డులను జారీ చేయనుంది. 2019 అక్టోబర్ 1 నుంచి ఇవి అందుబాటులోకి రానున్నవి. దీనికి సంబంధించి రోడ్డు రవాణా, రహదారుల మంత్రిత్వ శాఖ ఒక నోటిఫికేషన్ జారీ చేసింది. కొత్త డ్రైవింగ్ లైసెన్స్‌లలో అడ్వాన్స్‌డ్ మైక్రోచిప్ ఉంటుంది. వీటికి క్విక్ రెస్పాన్స్ (క్యూఆర్) కోడ్, నియర్ ఫీల్డ్ కమ్యూనికేషన్ (ఎన్‌ఎఫ్‌సీ) వంటి ప్రత్యేకతలుంటాయి. కొత్త టెక్నాలజీ వల్ల డ్రైవర్లకు సంబంధించిన వివరాలు, పెనాల్టీలు సెంట్రలైజ్‌డ్ ఆన్‌లైన్ డేటాబేస్‌లో పదేళ్లపాటు నిక్షిప్తమై ఉంటాయి. ఒకవేళ దివ్యాంగులైతే వారి కోసం ప్రత్యేకంగా తయారుచేసిన వాహనం ఉంటే ఆ వివరాలను కూడా కార్డుపై ముద్రిస్తారు. ఆర్‌సీలకు కూడా ఇదే టెక్నాలజీ వర్తిస్తుంది. ఇండియన్ యూనియన్ డ్రైవింగ్ లైసెన్స్, ఇండియన్ యూనియన్ వెహికల్ రిజిస్ట్రేషన్ పేరుతో కొత్త కార్డులను జారీ చేస్తారు. వాహన డ్రైవర్ పేరు, బ్లడ్ గ్రూప్, అవయవదానం చేస్తామంటూ ఇచ్చే డిక్లరేషన్ వివరాలన్నీ కూడా వీటిపై పొందుపరుస్తారు.
